Nyiɔɔ' 'kmʋ "kʋan "mlai
39
Dafi 'a 'dʋ ɔ "nyɩa 'dʋ bleʋn 'a klaa" ‑ɔɔ 'nynɩ nɩa Yedutumʋ ɛ.
2 'Ɩn wlu' 'de 'ma pɛe o 'ɩn 'na:
‑Ta dɛsaʋnʋʋ nɩa 'ʋn "juɛi ɛ,
'ma muɛ 'ma ‑cɛ" "jriɛ o sia',
‑wɛe dɛsaʋn je 'ʋn 'wɔn jii‑.
3 'Ɩn "muɛ wɔn 'ɩn ‑teɛ ‑snii',
'ɩn poɛ wɔn kpoi", 'kamɔ 'ɩn ‑te wɛe bʋ,
'kaa 'ma 'kle a 'kpaa "kpei.
4 'Ma pɛe siɛ' ‑sro,
ɛɛ' nɛ ‑sa 'ʋn wlu 'di 'sʋ 'ɩn 'na.
5 Tʋ "bo, ‑Ɩn ‑tɔɔ 'ʋn 'ma 'kmʋ 'a "ti na'.
‑Ɩn tɔɔ 'ʋn 'ma 'wɩ 'a ‑ti sʋn,
‑wɛe ka 'ma 'kmʋ "feea 'ʋn 'ɩn jeɛ juuo‑
6 Ka kwa 'di 'bɛa, 'kamɔ 'ma 'kmʋ se dɛwɔn nɩ‑
'de ‑ʋn "juɛi. Kɩɩn nyiɔɔ' 'kmʋ nɩɛ ka pooɔ' nɩa. ‑Te' ‑kwlʋ.
7 Ɩɩn, ɔ nɩɛ ka ‑fli ‑ɛɛ nʋ ‑mu' ‑ji' nɩa,
ɔɔ ‑si' ka pooɔ' nɩa.
Ɔɔ ‑pɔan' "wliiɛ i 'kaa nyɔ ‑jɩ "kpei sie ‑ɛ?
8 Kaan ka la Tʋ "bo, dɛ 'ɩn 'je fuo ‑ɛ?
‑Mɔ 'ɩn tba tɔi".
9 ‑Ɩn ‑sa 'ʋn 'ma dɩsaɩn ‑wee'‑ "klein "kpei,
‑ɩn ‑bo 'ʋn "itaiɛ nyʋ ‑sea' tɔ' 'di nɩ 'bo 'ʋn "kwu "kpei ‑saa.
10 'Ɩn "muɛ wɔn, 'ɩn se wɔn 'bai‑.
Dɛ ‑nʋɛ ‑mɔ ‑je wlu 'de 'ma ‑kɔ "i.
11 'Ma blaa' sie kan'. Ɛɛ' blati a jrooɛ 'ʋn 'dii.
12 'Snɩ Kea ‑tua" nyʋ ɛ, ɛmɛ ‑nɩ dɩsaɩn 'a ‑kao.
Ɔɔ' dɛ ‑ɛɛ ‑tɩ' kmai" 'de ɔ pɛe o ɛ,
ɛmɛ ‑ma ‑sai ka 'kɩn a dooa dɛ.
Kɩɩn nyiɔɔ' 'kmʋ nɩɛ ka pooɔ' ɔ ‑sia. ‑Te' ‑kwlʋ.
13 ‑Ɩn po 'ma baewlu doun" o Tʋ "bo, ‑ɩn po doun" i,
‑ɩn ‑bo doun" "suɛn, ka 'ma "bɛma ‑wi" nɩa,
'ɩn nɩɛ ‑sii' ‑o 'de ‑ʋn "juɛi.
14 Nɔ" ‑tɩ 'ɩn 'je 'kmʋ 'wlʋ ‑wɛe 'ɩn 'je mu ɛ,
‑ɩn ‑sa 'ʋn "jriɛ ‑pʋn" 'de 'ɩn 'je 'kɩɩɛ ka 'je.